$ 543.24 € 619.89 ₽ 6.78

Енді жедел жәрдем тәулік бойы қызмет көрсетуін тоқтата ма?: Денсаулық министрлігі түсініктеме берді

Редакция
26 қыркүйек 2024 01:56 3400
Енді жедел жәрдем тәулік бойы қызмет көрсетуін тоқтата ма?: Денсаулық министрлігі түсініктеме берді Сурет авторы: ашық дереккөзден

Денсаулық сақтау министрлігі жедел медициналық көмек көрсету қағидаларына өзгеріс енгізу жөніндегі бұйрықтың жобасын әзірлеп, қоғам талқысына шығарған еді. Өзгерістерге сәйкес, жедел жәрдем 4-санаттағы* шақыртуларға тәулік бойы емес, кесте бойынша, яғни жұмыс уақытында таңғы сағат 08:00-ден 18:00-ге дейін, сенбі күні 8:00-ден 12:00-ге дейін шығады, ал жексенбі – демалыс. 

Алайда Денсаулық сақтау министрлігі кейбір БАҚ жоба мазмұынын қате түсіндіріп жатыр деп мәлімдеді.

"Бұрынғыдай, 103 нөміріне қоңырау шалған барлық пациент шақырту санатына қарамастан, толық көлемде медициналық көмек алады", – деді министрліктің ресми өкілі Айгерім Уразалиева.

Ол жедел жұмыс істеу үшін жұмыс уақытында IV санаттағы шақыртуларға қызмет көрсетуге медициналық-санитариялық алғашқы көмектің мобилдік бригадалары тартылатын болады деп айтып өтті. Айтуынша, кешкі және түнгі уақытта, сондай-ақ демалыс күндері барлық санаттағы шақыртуларға жедел көмек бригадалары қызмет көрсететін болады.

"Азаматтар үшін ештеңе өзгермейді, бірде-бір шақырту назардан тыс қалмайды әрі пациенттерге қызмет көрсету жеделдеп, сапасы одан әрі жақсарады", – деп түсіндірді Уразалиева.
 

*Пациенттің өмірі мен денсаулығына тікелей қатер төнбесе, төртінші санаттағы шақыртуға жатады.

 

Соңғы жаңалықтар