Енді шенеуніктерді жасанды интеллект іріктейді: Мемлекеттік қызметте үлкен реформа басталды

Мемлекеттік қызмет істері агенттігінің төрағасы Дархан Жазықбай Алматы қаласына жасаған жұмыс сапары аясында қала активімен және өңір жастарымен кездесіп, мемлекеттік қызмет жүйесін жаңғыртуға әрі сервистік мемлекеттік аппаратты қалыптастыруға бағытталған жаңа заңның негізгі ережелерін түсіндірді.

Өз сөзінде Агенттік басшысы Мемлекет басшысының «Адам мемлекет үшін емес, мемлекет адам үшін» деген тұжырымдамасына тоқталып, жаңа заң аясында мансаптық және позициялық тәсілдердің артықшылықтарын біріктіретін гибридті модель қалыптасқанын атап өтті. Енді үміткерлерді іріктеу кезінде олардың тек мемлекеттік органдардағы ғана емес, квазимемлекеттік және жеке секторлардағы таңдаған лауазымының функционалдық бағытына сәйкес келетін жиынтық еңбек өтілі ескеріледі, сондай-ақ шенеуніктердің адалдығын қамтамасыз ету мақсатында «мінсіз бедел» институты енгізіледі.

Кадрлық процестерді заманауи үрдістерге сай бейімдеу мақсатында мемлекеттік қызметке іріктеу процедуралары толықтай цифрлық форматқа ауыстырылып, конкурстар «Е-қызмет» жүйесі арқылы жүзеге асырылады. Мұнымен қоса, қызметшілердің жасанды интеллект саласындағы дағдыларын дамыту мақсатында іске қосылған «AI Qyzmet» бағдарламасы бойынша республика көлемінде 60 мыңға жуық маман, оның ішінде Алматы қаласынан 2 700-ден астам қызметші оқудан өтті. Сыбайлас жемқорлыққа төзбеушілік мәдениетін қалыптастыру мәселесі де назардан тыс қалмай, жүргізілген әлеуметтік зерттеулер нәтижесінде отандық азаматтардың 69%-ы бұл дертпен күреске өздігінен атсалысуға дайын екендігін білдірген.

Реформа аясында білікті жастарды мемлекеттік басқару ісіне тарту бағытында да бірнеше тиімді тетіктер қарастырылған. Қазіргі таңда жоғары оқу орындарын үздік аяқтаған (GPA 3,33-тен жоғары) түлектер үшін аудандық және ауылдық деңгейдегі төменгі лауазымдарға конкурссыз орналасу мүмкіндігі беріліп, осы тәсілмен республика бойынша 860 жас маман, оның ішінде Қ.И. Сәтбаев атындағы ҚазҰТЗУ-дың 4 түлегі жұмысқа қабылданды. Сонымен қатар, кездесуде Президенттік жастар кадр резерві мен биыл алғаш рет ұйымдастырылған Өңірлік жастар кадр резервінің артықшылықтары түсіндіріліп, Алматы өңірінен аталған резервтердің құрамына енген дарынды жастардың жетістіктері айтылды. Жұмыс сапарының қорытындысы бойынша Дархан Жазықбай мемлекеттік қызмет ардагерлерін арнайы төсбелгілермен марапаттап, бірқатар белсенді қызметшілер мен студенттерге Агенттік төрағасының Грамоталары мен Алғыс хаттарын табыс етті, сондай-ақ «Almaty TV» телеарнасына реформалардың маңызы туралы кеңінен сұхбат берді.