Көлік сатып алу енді жеңілдей ме? Елімізде автолизинг бағдарламасы басталды

Бүгін Қазақстанда автолизинг бағдарламасы ресми түрде іске қосылды. Бұл – көлікті ұзақ мерзімге белгіленген ай сайынғы төлемдермен жалға алу және кейіннен сатып алу мүмкіндігін беретін жаңа қаржылық құрал.

Өнеркәсіп және құрылыс министрлігі автолизинг бойынша ең жоғары жылдық мөлшерлемені 36 пайыз деңгейінде бекітті.

Бағдарлама шарттары бастапқы жарна көлеміне, лизинг мерзіміне және компанияның ішкі талаптарына байланысты айқындалады. Министрлік Автокөлік одағы және Өнеркәсіптік инвесторлар одағымен меморандумға қол қоюға дайындалып жатыр. Құжатта жеке тұлғалармен жұмыс істейтін компанияларға арналған бірыңғай талаптар, мерзімдер мен шарттар көрсетіледі.

Ресми мәліметке сәйкес, лизинг тетігін жетілдіру жұмыстары мемлекеттік органдармен бірлесіп жалғасады. Мақсат – бағдарламаны халық үшін барынша түсінікті әрі қолжетімді ету.

Автолизингке берілетін көлікке де белгілі бір талаптар қойылады:

• көліктің қауіпсіздік сертификаты болуы тиіс;

• көлік түрінің мақұлдау құжаты және электрондық паспорты болуы қажет;

• бағдарламаға жаңа да, бұған дейін лизингте болған көліктер де қатыса алады.

Индустрия және құрылыс министрлігінің автомобиль өнеркәсібі және ауыл шаруашылығы техникасы басқармасының басшысы Руслан Хисамутдиновтың айтуынша, лизинг мерзімі ішінде көлік лизинг компаниясының балансында болады.

«Көлікті күтіп ұстау мен сақтандыру шарттары азамат пен лизинг компаниясы арасындағы келісімде айқындалады. Барлық талаптар азаматтық кодекс шеңберінде қарастырылады», – деді ол 24kz тілшісіне.

Бағдарлама автонарықты жандандырумен қатар, қазақстандықтар үшін жаңа көлікті қолжетімді етуге бағытталған.