Енді интернет арқылы алған әр тауар декларацияланады

Қазақстан Сенаты Еуразиялық экономикалық одақтың Кеден кодексіне өзгерістер енгізу туралы хаттаманы ратификациялады. Енді шетелдік интернет-дүкендерден жеке тұлғаларға келетін барлық тауарлар кеденде міндетті түрде декларацияланатын болады.

Сенатор Бекбол Орынбасаровтың айтуынша, жаңа заң нормалары электрондық сауданы заң жүзінде реттеп, бюджетке қосымша салықтар мен кедендік төлемдер түсіруге мүмкіндік береді.

«Электронды сауда соңғы жылдары қарқынды дамып келеді. Мәселен, 2024 жылы Қазақстандағы онлайн-сауданың көлемі 3,2 трлн теңгеге жетті. Сондықтан оны дұрыс реттеп, заң аясында бақылау қажет», – деді ол.

Жаңа ереже бойынша:

• – Интернет арқылы алынған тауарлар жеке категорияға бөлінеді – «электрондық сауда тауарлары»;

• – Декларациялаудың жаңа түрі енгізіледі – «электрондық сауда декларациясы»;

• – «Электрондық сауда операторы» ұғымы енгізіледі – яғни, шетелдік интернет-дүкеннен келген сәлемдемені жеткізетін пошта операторлары;

• – бұрынғыдай тек 200 еуродан немесе 31 кг-нан асқан жағдайда ғана емес, барлық тауар көлемі декларацияланады.

Бұл өзгерістер кедендік әкімшілендіруді жақсартып, тауар қауіпсіздігі мен техникалық талаптарға сай болуын қадағалауға, сондай-ақ бюджет түсімін арттыруға бағытталған.