Енді елімізде қоқыс шығару тарифі үш жыл сайын қайта қаралады

Экология және табиғи ресурстар министрлігі тұрмыстық қатты қалдықтарды шығару тарифтерін әр үш жыл сайын қайта қарап отыру туралы Экологиялық кодекске түзетулер әзірледі. Бұл туралы министр Ерлан Нысанбаев Үкімет отырысында мәлімдеді.

Министрдің айтуынша, 2021 жылы қабылданған Экологиялық кодекске сәйкес, әкімдіктер мәслихаттар арқылы қоқыс шығару тарифтерін қайта қарап, бекітуге тиіс болған. Бірақ қазіргі уақытта елдегі 211 аудан мен қаланың тек 155-інде ғана тарифтер қайта қаралған. Бұл міндет Павлодар, Шығыс Қазақстан және Алматы облыстарында толық орындалмаған.

«Тұрмыстық қатты қалдықтарға бекітілген тарифтер көбіне арнайы кәсіпорындардың нақты шығындарын жаппайды. Мысалы, Атырау қаласында тариф 379 теңге болып бекітілген, ал әкімдік ұсынған экономикалық негізделген тариф 527 теңгені құраған», – деді министр.

Оның айтуынша, бұл мәселені шешу үшін мемлекеттік-жекеменшік әріптестік механизмі қолданылады. Яғни, экономикалық тартымды тариф бекітіледі, ал қазіргі тариф пен экономикалық негізделген тариф арасындағы айырмашылық жеке серіктестерге утилизациялық төлемдер есебінен өтеледі.

«Жүйелі шешім үшін біз экономикалық тартымды тарифтерді бекіту құзыретін әкімдіктер деңгейіне беруді ұсынып отырмыз. Қазіргі уақытта заңнамаға тиісті түзетулер мәжілістің қарауында жатыр. Сондай-ақ тарифті қайта қарау жиілігін үш жылда бір реттен кем емес етіп белгілеуді жоспарладық», – деді Ерлан Нысанбаев.

Министрдің дерегінше, елде жыл сайын 4,5 млн тоннадан астам тұрмыстық қалдық пайда болады. 2024 жылы қалдықтарды қайта өңдеу деңгейі жоспарланған 30%-дың орнына 25,8%-ды құраған. 20 өңірдің жетеуінде жоспарлы көрсеткіштерге қол жеткізілмеген. Олардың арасында Ұлытау облысында – 12%, Алматы облысында – 7,3%, Маңғыстау облысында – 5,5%, Солтүстік Қазақстан облысында – 5%, Шымкент қаласында – 3,5% көрсеткіш тіркелген.