Енді елімізде арнайы сараптамадан өтпеген фильмдер көрсетілмейді

Қазақстанда шетелдік және отандық фильмдерді прокатқа шығармас бұрын арнайы Сараптама комиссиясында қарау жоспарланып отыр. Бұл туралы Премьер-министр Олжас Бектенов Мәжіліс депутаттарының сауалына берген ресми жауабында мәлімдеді.

Үкімет әзірлеген тиісті түзетулерді Мәжіліс 2025 жылдың соңында қабылдаған. Құжат қазір Сенаттың қарауында. Түзетулер күшіне енгеннен кейін барлық фильм кинотеатрларда көрсетілмес бұрын арнайы комиссияның сүзгісінен өтеді. Сонымен қатар елдегі кино прокатқа тұрақты мониторинг жүргізу күшейтіледі.

Премьер-министрдің жауабында Мәдениет және ақпарат министрлігі заң талаптарының бұзылуына жол бермеу үшін мазмұны ұлт бірлігін нығайтуға бағытталған контентті көбейтуге басымдық беретіні айтылған. Бұл шаралар мәдениет саласындағы идеологиялық және қоғамдық жауапкершілікті күшейтуге бағытталмақ.

Мәжіліс депутаттарының сауалына кинотеатрларда көрсетілген «Руың кім?» фильмі түрткі болған. Аталған туынды көрермендер арасында қызу пікірталас туғызып, сынға ұшыраған еді.

Депутат Ерлан Саиров рушылдықты насихаттайтын контенттің қауіпті тенденцияға айналып бара жатқанын айтып, мұндай құбылыс ұлттың ішкі бірлігіне зиян келтіретінін мәлімдеген. Сыннан кейін фильм 2025 жылғы 18 желтоқсаннан бастап прокаттан алынды.