Енді бала күтіміне шыққан әкенің де еңбек өтілі есептеледі

Мәжілісте Еңбек кодексіне өзгерістер енгізу туралы заң жобасын таныстырған депутат Асхат Аймағамбетов ата-аналардың тең құқықтары мен әлеуметтік әділеттілікті қамтамасыз етуге бағытталған маңызды түзету енгізілгенін айтты.

Оның айтуынша, қазіргі заңнамада үш жасқа дейінгі бала күтімімен үйде отырған ананың бұл кезеңі еңбек өтіліне есептеледі, ал әкелер мұндай құқықтан айырылған.

«Біз бұл теңсіздікті жоюды ұсынамыз. Егер заң қабылданса, бала күтіміне шыққан әкенің де бұл уақыты еңбек өтіліне қосылады. Бұл – тек әлеуметтік әділеттілік емес, сонымен қатар отбасындағы ата-аналық жауапкершілікті теңестіретін қадам», – деді Асхат Аймағамбетов.

Сонымен қатар, депутат заң жобасында жұмысшылардың құқықтарын қорғауға, еңбек дауларында әділдік орнатуға және өндірістегі жазатайым оқиғалар кезінде қызметкерлердің мүддесін қорғауға арналған бірқатар жаңа нормалар қарастырылғанын атап өтті.

Аймағамбетовтың айтуынша, ұсынылған түзетулер еңбек қатынастарындағы әділетсіздікті жойып, жұмысшылар мен олардың отбасыларының әлеуметтік қорғалу деңгейін арттыруға бағытталған.