Енді Астанада қызылшаға қарсы екпе алмаған балаларды ауруханаға жатқызбайды

Астана қаласында балаларды ауруханаға жатқызу тәртібі күшейтілді. Енді стационарға қабылдау қызылшаға қарсы екпесі бар балаларға ғана рұқсат етіледі. Тиісті қаулыға қаланың бас мемлекеттік санитариялық дәрігері қол қойды.

Шешім қызылшамен сырқаттанушылықтың күрт өсуіне байланысты қабылданды. 6–28 қаңтар аралығында қалада 403 расталған жағдай тіркелген, бұл айдың алғашқы аптасымен салыстырғанда шамамен үш есе көп.

Науқастардың басым бөлігі – егілмеген балалар. Атап айтқанда, 257 жағдайда ата-аналар екпеден бас тартқан, 112 бала жасына байланысты вакцина ала алмаған, 9 деректе жоспарлы екпені өткізіп алу тіркелген, ал 7 балада медициналық қарсы көрсетілім болған.

Қаулыға сәйкес, 18 жасқа дейінгі балалар мен жасөспірімдердің вакциналық қорғанысын бағалау жүргізіліп, ата-аналардың келісімімен қуып жету вакцинациясы ұйымдастырылады. Сондай-ақ 55 жасқа дейінгі медицина қызметкерлерінің екпе мәртебесі тексеріледі, ал 6–10 айлық балаларға қосымша вакцина егу қарастырылған.

Білім беру ұйымдарының басшыларына күн сайын «таңертеңгі сүзгі» жүргізу міндеттелді: ауру белгілері бар балалар ата-аналары келгенше оқшауланып, қажет болған жағдайда стационарға жіберіледі. Ал профилактикалық екпесі жоқ балаларды ұжымға қабылдау ұжымдық иммунитет деңгейі кемінде 90% болғанда ғана мүмкін болады.