Енді әскерге шақырылушылар әскери бөлімді өздері таңдай алады

Қазақстанда әскерге шақырылушылар қызмет ететін әскери бөлімді өздері таңдай алады. Қорғаныс министрлігі MyArmy.kz атты жаңа интернет-порталды іске қосты. Ведомствоның хабарлауынша, бұл жүйе әскерге шақыру рәсімдерін жеңілдетуге және шақыру комиссияларының жұмысын ашық етуге бағытталған.

Енді тіркелу мен құжат рәсімдеу онлайн форматқа көшіріліп, бюрократия азайып, адами фактордың ықпалы төмендемек. Портал арқылы әскерге шақырылушылар жергілікті әскери басқару органдарына бармай-ақ, мерзімді немесе келісімшарт негізіндегі қызметке өтініш бере алады, жиі қойылатын сұрақтармен танысып, кері байланыс алу мүмкіндігіне ие.

Сонымен қатар болашақ сарбаздар өз мамандықтарына және алған әскери машықтарының азаматтық салада қолданылу мүмкіндігіне қарай, қай әскери бөлімде қызмет атқаратынын өздері таңдай алады.

Қорғаныс министрлігі түсіндіргендей, порталда өтінім үш кезеңнен өтеді: «жасалды», «өңделуде» және «мақұлданды» (немесе «қабылданбады»). Алдымен өтінім қабылданып, тексеру жүргізіледі. Кейін медициналық тексеруден өту үшін жергілікті әскери комиссариатқа бару қажет болады. Осыдан соң нәтижелерге байланысты өтінім мақұлданады немесе қабылданбайды.

Жаңа жоба Алматы облысында пилоттық режимде жүзеге асып жатыр. Ол Sarbaz+ жобасы аясында іске қосылған. Бүгінде Алматы қаласының Қорғаныс істері жөніндегі департаментінде іріктеу жүргізіліп жатыр. Жоба сынақтан сәтті өтсе, Қарулы күштердің басқа әскери бөлімдерінде де енгізілмек.