Емі жоқ қауіпті инфекция: ДДСҰ Нипах вирусы туралы мәлімдеме жасады

Дүниежүзілік денсаулық сақтау ұйымы (ДДСҰ) Үндістанда анықталған Нипах вирусын жұқтыру жағдайларына байланысты саяхат пен саудаға шектеу қоюды ұсынбайды.

Қаңтар айында Батыс Бенгалия штатында инфекция жұқтырудың екі расталған жағдайы тіркелді. ДДСҰ мәліметінше, жеке емханалардың бірінде екі медицина қызметкері вирус жұқтырған. Үндістан билігі олармен байланыста болған 200-ге жуық адамды бақылауға алды, жаңа жұқтыру жағдайлары анықталған жоқ. Мамандар вирустың адамнан адамға тұрақты түрде берілу белгілерін байқамады.

«Инфекцияның аймақтық және жаһандық деңгейде таралу қаупі төмен деп бағаланады», – деп атап өтті ДДСҰ өкілдері.

Ұйым қазіргі мәліметтер негізінде халықаралық сапарларға немесе саудаға шектеулер енгізуді ұсынбайтынын қадап айтты.

Нипах вирусы – жануарлардан адамға, ал кейбір жағдайларда тығыз байланыс кезінде адамнан адамға берілетін сирек кездесетін, бірақ қауіпті инфекция. ДДСҰ деректері бойынша, бұл вирусқа қарсы вакцина мен арнайы емдеу әдісі жоқ, ал өлім-жітім деңгейі әртүрлі өршулер кезінде 40-75%-ға дейін жеткен.

Бұған дейін ұйым Нипах вирусын халықаралық деңгейде ірі індет тудыруы мүмкін патогендер тізіміне қосқан болатын.

Үндістаннан келген хабарларға байланысты Қазақстанда шекарада санитарлық-карантиндік бақылау күшейтілді, алайда елде вирус жұқтыру немесе оны сырттан әкелу жағдайлары тіркелген жоқ.