Емхананың қателігінен мүмкіндігі шектеулі бала 7 жыл бойы қажетті көмек алмаған

Қызылорда қаласының тұрғыны 2016 жылы ұл баланы дүниеге әкелген. Балаға бірден "Мидың қан айналымының жіті бұзылуы, геморрагиялық түрі. Супратенториалды қан кету" диагнозы қойылған. Дегенмен қалалық емханада есепке алынғанына қарамастан, балаға қажетті деңгейде диспансерлік бақылау жүргізілмеген.

Осының салдарынан балаға мүгедектік топ тек 7 жыл өткен соң ғана берілген. Осы уақыт аралығында медициналық бақылау тиісті деңгейде жүргізілмей, емдік-сауықтыру шаралары жүзеге асырылмаған, ал неврологиялық бақылау толық көлемде өтпеген.

Облыстық медициналық және фармацевтикалық бақылау комитетінің департаменті жүргізген жоспардан тыс тексеру нәтижесінде учаскелік дәрігерге ескерту беріліп, емхана басшылығына мүгедектігі бар балаларға жәрдемақы тағайындау мен оны рәсімдеу тәртібін бұзбау туралы нұсқау берілді.

Анасының айтуынша, баласына уақытында мүгедектік тобы берілмегендіктен, санаториялық емдеу шараларына жіберілмеген, бұл оның денсаулығының нашарлауына әкелді. Осы себептерге байланысты анасы Қызылорда қалалық сотына моральдық зиян үшін өтемақы өндіру туралы талап арызбен жүгінген.

Сот анасының моральдық және физикалық зиян шеккенін ескеріп, талап арызды қанағаттандырды. Емхана кінәлі деп танылып, анасына 1 млн теңге көлемінде моральдық зиян өтемақысы төленетін болды. Сот шешімі заңды күшіне енген жоқ.