Емдеуден бас тартқан: Оралда азаматтың өліміне байланысты ауруханаға ірі айыппұл салынды

Орал қаласының №2 соты ауруханада қайтыс болған 58 жастағы науқастың ұлына 4 миллион теңге көлемінде моральдық зиян өтемақысын төлеуді қалалық ауруханаға міндеттеді. Бұл туралы Қазақстанның Жоғарғы соты хабарлады.

Марқұмның ұлы әкесінің өліміне медицина қызметкерлерінің әрекеті немесе әрекетсіздігі себеп болуы мүмкін екенін айтып, аурухана мен емдеуші дәрігерден өтемақы өндіруді сұраған. Аурухана өкілі талапты мойындамаған.

Бұған дейін ер адам полицияға арызданған. Алайда қылмыстық құқық бұзушылық құрамы болмағандықтан, сотқа дейінгі тергеу тоқтатылған. Кейін Медициналық және фармацевтикалық бақылау комитеті департаментінің тексеруі науқасқа көмек көрсету кезінде бірқатар заңбұзушылық болғанын анықтады.

Сот мәліметінше, науқас бірнеше рет медициналық көмекке жүгінгенімен, оған тексеру жүргізілмеген. Медицина қызметкерлері ер адамның мас күйде болғанын алға тартқан. Алайда оның ағзасындағы алкоголь мөлшерін анықтайтын талдау жасалмаған.

Науқас денсаулық сақтау басқармасының байланыс орталығына хабарласқаннан кейін ғана ауруханаға жатқызылған. Терапия бөлімінде оған ишемиялық инсульт диагнозы қойылған. Ем басталғанына қарамастан, ер адам келесі күні жансақтау бөлімінде қайтыс болды.

Сот медициналық көмектің уақытында көрсетілмеуі науқасты өлімнің алдын алу мүмкіндігінен айырды деген қорытындыға келді. Марқұмның ұлының талабы ішінара қанағаттандырылып, ауруханадан 4 миллион теңге өндірілді.