Еліміздің қай өңірлерінде онкология көп тіркеледі?

«ҚазОжРҒЗИ» Бас және мойын ісіктері орталығының жетекшісі Мұрат Қайбаров пен онколог Оразбек Ешнязов еліміздегі қатерлі ісік эпидемиологиясына қатысты маңызды деректермен “ОнкоАқиқат” подкастында бөлісті.

Дәрігерлердің айтуынша, ауру көрсеткіші мен оның асқынуы бойынша Павлодар, Қарағанды, Семей және Өскемен өңірлері көш бастап тұр. Бұл аймақтардағы экологиялық жағдайға мына факторлар тікелей әсер етуде:

• Өндіріс орындарының шоғырлануы;
• Бұрынғы ядролық полигон аймақтары;
•  Уран кеніштері мен шахталардың жұмысы.

“Батыс өңірлерінде статистиканың өзгеруіне «шекаралас миграция» себеп болып отыр. Жағдайы бар азаматтар Ресейге барып емделсе, дерт әбден асқынғанда ғана отандық мамандарға жүгінеді. Сонымен қатар, миллионнан астам тұрғыны бар Астана, Алматы және Шымкент қалаларында урбанизация (англомерация) есебінен науқастар саны артып келеді”,-деді Қайбаров Мурат.

Мамандар жүргізген сараптама көңіл көншітпейді. Онкологиядан емделгеннен кейінгі 5 жылдық өмір сүру деңгейі 30-40%-ға дейін төмендеп кеткен.

Медицинада «бес жылдық өмір сүру көрсеткіші» - науқастың толық айығып кету мүмкіндігін айқындайтын ең маңызды статистикалық меже болып табылады. Осы уақыт аралығынан өткеннен кейін аурудың қайталану қаупі едәуір азайып, адам сауыққандар қатарына қосылады. Алайда қазіргі таңда Қазақстанда онкологиядан емделгеннен кейінгі бұл көрсеткіштің төмендеп кетуі - дерттің өте асқынған кезеңде анықталуы мен емдеудің тиімділігіне кедергі келтіретін факторлардың әлі де басым екенін көрсетеді.