Еліміздің 217 мектебінде дзюдо сабағы енгізіледі

2026 жылдан бастап Қазақстанның 217 мектебінде дзюдо секциясы тұрақты түрде жұмыс істей бастайды. Бұл туралы Мемлекет басшысының баспасөз хатшысы Руслан Желдібай хабарлады.

Жоба Президенттің тапсырмасы бойынша жүзеге асырылады және Халықаралық дзюдо федерациясының (IJF) қолдауымен енгізілмек.

«Халықаралық дзюдо федерациясы оқушыларға арналған арнайы жеңілдетілген бағдарламасын бізге толық беріп отыр. Осы шешім үшін IJF басшылығына алғыс білдіремін», – деп жазды Руслан Желдібай.

Бағдарлама аясында алғашқы кезеңде 217 мектеп қамтылса, алдағы үш жылда 1 мың мектепке дейін кеңейту жоспарланған. Басымдық ауылдық мектептерге беріледі. Сонымен қатар, жаттықтырушыларды даярлау мен инфрақұрылымды жетілдіруге де назар аударылады.

Президенттің баспасөз хатшысы атап өткендей, дзюдо – тек спорт түрі емес, тәрбиелік маңызы зор бағыт:

«Дзюдо сабырлылық пен төзімділікке, тәртіпке бағынуға, қарсыласты құрметтеуге үйретеді. Бұл мінез қалыптастыратын, денсаулыққа пайдалы спорт. Ұлдар да, қыздар да айналыса алады және үлкен қаржылық шығынды қажет етпейді», – деді ол.

Жаңа бастама оқушылардың спортқа қызығушылығын арттырып, жаппай салауатты өмір салтын насихаттау мен жастардың тәрбиелік дамуына үлес қосуға бағытталған.