Елімізде жылыту маусымына дайындық кешеуілдеп жатыр: Бектенов әкімдерді қатаң сынға алды

Қазақстанның бірнеше өңірінде жылыту маусымына дайындық жоспардан кешігіп келеді. Бұл туралы Үкімет отырысында Премьер-министр Олжас Бектенов мәлімдеді. Оның айтуынша, қысқа аз уақыт қалса да, бірқатар жылу электр орталығында жөндеу жұмыстары аяқталмаған.

Ақмола облысындағы Степногорск ЖЭО-да резервтік қазандықтың жөндеуі аяқталмаған, ал Маңғыстау облысында ЖЭО-2-де екі турбинаның жөндеу мерзімі кейінге шегерілген. Сондай-ақ Ақтауда жылу желілерін жаңғырту қарқыны төмен. Премьер-министр мұндай жағдай барлық өңірде бар екенін атап өтті.

«Бұндай жағдайлар әкімдер тарапынан жоспарлаудың нашар болуы мен қатаң бақылаудың жоқ екенін көрсетеді. Кейбір облыстарда қысқа дайындық бойынша Өңірлік штабтардың жұмыстары мардымсыз болып отыр.», – деді Бектенов.

Энергетика министрлігінің мәліметінше, биыл электр станцияларында 10 энергия блогы, 63 қазандық пен 39 турбинаны жөндеу жоспарланған. Қазіргі таңда 66% жылу желілерінің жұмысы орындалды. Дегенмен Солтүстік Қазақстан, Шығыс Қазақстан, Ақмола және Алматы облыстарында жоспарланған жұмыстардың жартысына жуығы әлі аяқталмаған.

Сондай-ақ көмір қоры бірқатар аймақта жеткіліксіз. Абай, Ұлытау облыстарында және Астанада көмір қоры 15% көлемінде ғана. Жетісу облысында – 6%. Шымкент, Алматы және тағы бірнеше өңірде қордың жартысына жуығы ғана жиналған.

Премьер-министр жауапты ведомстволар мен әкімдіктерге мынадай тапсырмалар берді:

• Энергообъектілердегі жөндеу жұмыстарын уақытылы аяқтау;

• 1 қыркүйекке дейін әлеуметтік мазут жеткізу кестесін бекіту;

• Көмір мен мазутты кестеге сәйкес уақытылы жеткізу;

• 1 қыркүйекке дейін білім беру нысандарын, 15 қазанға дейін денсаулық сақтау, тұрғын үй-коммуналдық шаруашылық және тұрғын үйлерді толық дайын ету.

«Жылыту маусымына дайындық паспорты жоқ жағдайда жауапты тұлғалар жауапкершілікке тартылады. Әр өңірде бұл мәселе қатаң бақылауда болуы тиіс», – деп ескертті Бектенов.

Оның айтуынша, Риддер, Кентау, Екібастұз және Ақтау қалаларындағы энергия көздері ерекше бақылауда болады.