Елімізде тағы бір телеарна ашылады

Алматы облысында жаңа «Qonaev Media» өңірлік телеарнасы іске қосылады. Бұл туралы телеарна басшылығы арнайы баспасөз мәслихатында хабарлады.

Арна тек Алматы облысында ғана емес, бүкіл республика аумағында тікелей эфирде хабар таратады. Телеарнаның директоры болып танымал тележүргізуші Қымбат Хангелдина, ал бас продюсері болып Қымбат Досжан тағайындалды.

"Мамыр айында кезең-кезеңімен іске қосыла бастаймыз. Жалпы штат саны – 80 адам. Негізгі құрам анықталғанымен, әлі де телеарнаның «ыстығына күйіп, суығына тоңуға» дайын әріптестерді іріктеп, жұмысқа қабылдаймыз. Қазіргі таңда жұмыс жоспары әзірлену үстінде", – деді телеарна директоры Қымбат Хангелдина.

Телеарна облыстық деңгейде болғандықтан, оның қаржыландыруы облыс бюджетінен жүргізіледі. Дегенмен көрермен ықыласына ие болса, өзін-өзі ақтайтын коммерциялық жобалар да қолға алынады.

Эфирде жаңалықтардан бөлек, түрлі форматтағы бағдарламалар ұсынылады.

"Ақпараттық хабарлар күнделікті үш мезгіл эфирден беріледі. Апта сайын ақпараттық-сараптамалық бағдарламалар да жарық көреді. Өңірдің әлеуеті зор. Сондықтан мәдениет, спорт, туризм бағыттарын қамтитын циклдік жобалар әзірленеді", – деді бас продюсер Қымбат Досжан.

Қазіргі басты міндеттердің бірі – телеарнаны жеке кеңсемен қамтамасыз ету. Әзірге уақытша Алматы қаласында орналасатын арна алдағы уақытта Қонаев қаласындағы медиаорталық ашылғаннан кейін толықтай сонда көшеді. Болашақта телеарна жанынан жергілікті радиостанция да ашылады.