Елімізде созылмалы бүйрек ауруларын емдейтін дәрі шығарыла бастады

Алматыдағы «Нобел Алматы фармацевтикалық фабрикасы» базасында созылмалы бүйрек ауруын, созылмалы жүрек жеткіліксіздігін және 2 типтегі қант диабетін емдеуге арналған «Форсига» атты инновациялық препараттың жергілікті өндірісі жолға қойылды.

Денсаулық сақтау вице-министрі Тимур Мұратовтың айтуынша, бұл жоба – Қазақстандағы денсаулық сақтау және фармацевтика салаларын дамытудағы маңызды қадам. Ол заманауи әрі тиімді дәрілердің қолжетімділігін арттырып, пациенттерді үздіксіз қажетті терапиямен қамтамасыз етуге мүмкіндік береді.

ҚР бас штаттан тыс эндокринологы Лаура Даньярова қазіргі таңда амбулаториялық ем қабылдайтын пациенттердің төрттен бірі осындай препараттарды пайдаланатынын айтты. Енді бұл препараттың бір молекуласы елімізде өндіріле бастағаны – тиімді ем жүргізуге қосымша мүмкіндік.

Президент Қасым-Жомарт Тоқаевтың Жолдауында айтылған тапсырмаға сәйкес, елімізде дәрі-дәрмектер мен медициналық бұйымдардың отандық өндіріс үлесін 50%-ға жеткізу көзделген. Осы жобаға «АстраЗенека» компаниясы 5 млн АҚШ доллары көлемінде инвестиция салып отыр, ал 2030 жылға дейін бұл көлем 40 млн долларға дейін өседі деп жоспарланған.

Нефролог, профессор Салтанат Туғанбекованың айтуынша, қазіргі таңда 15 мыңға жуық пациент алмастырғыш терапияны қажет етеді, олардың көпшілігі – жастар. Енді сенімді, тиімді және жергілікті өндірілген препаратты пайдалану мүмкіндігі пайда болып отыр.

Бұл жоба Қазақстан, Ұлыбритания және Швеция арасындағы инвестициялық әріптестіктің жарқын үлгісі болып табылады. Сонымен қатар 2020–2025 жылдарға арналған фармацевтикалық өнеркәсіпті дамыту жөніндегі кешенді жоспардың аясында іске асырылып отыр.