Елімізде креативті индустрияны дамыту қоры құрылады

Қазақстанда шығармашылық саланы қолдау мақсатында Креативті индустрияны дамыту қоры құрылатын болды. Бұл туралы Үкімет отырысында ҚР Мәдениет және ақпарат министрі Аида Балаева мәлімдеді.

Министрдің айтуынша, Мемлекет басшысы Қасым-Жомарт Тоқаев 2021 жылғы Жолдауында креативті индустрияны дамыту үшін арнайы институт құруды тапсырған болатын. Осы тапсырмаға сәйкес, креативті индустрияны дамытуға жәрдемдесетін заңды тұлға ретінде Креативті индустрияларды дамыту қоры құрылмақ.

Қор Қазақстанның жетекші шығармашылық және білім беру ұйымдарының қатысуымен корпоративтік қор ретінде құрылады және негізгі 4 бағыт бойынша жұмыс істейді:

1. Таланттарды анықтау
   Қор таланттарды анықтау үшін конкурстар, креатондар, мобильді продюсерлік орталықтар ұйымдастырып, өңірлердегі жас дарындарды іздейді.

2. Жобаларды дамыту
   Стартаптарды дамыту мақсатында акселерация және инкубация бағдарламалары жүзеге асырылады. Жобаларды коммерцияландыру мен инвестиция тартуға қолдау көрсетіледі.

3. Инфрақұрылымды дамыту
   Хабтар желісін кеңейту, тұрақты арт-алаңдар құру және мемлекеттік мүлікке қол жеткізуді қамтамасыз ету шаралары қолға алынады.

4. Экспортқа қолдау көрсету
   Қор қазақстандық шығармашылық өнімдерді шетелдік нарыққа шығаруға көмектеседі. Сонымен қатар маркетинг және PR шаралары ұйымдастырылып, авторлық құқықты қорғауға басымдық беріледі.

Аида Балаеваның айтуынша, Креативті индустрияны дамыту қорының бюджеті ұлттық лотерея операторының қызметінен бөлінетін 3% аударым есебінен қалыптастырылады. Қор қызметінің маңызды бағыттарының бірі – креативті индустрияға венчурлық инвестицияларды тарту болмақ. Осыған байланысты АХҚО базасында басқарушы компаниялардың пулын тарта отырып, ақшалай қаражатты тиімді орналастыруға мүмкіндік беретін венчурлық бөлімше құрылатын болады.