Елімізде көлік нөмірін мұраға қалдыруға рұқсат беріледі

Қазақстанда автокөлік мемлекеттік нөмірлерін мұраға қалдыруға рұқсат беріледі. Бұл өзгерістерді Ішкі істер министрлігі енгізіп, жаңа ережелер 2026 жылғы 25 мамырдан бастап күшіне енеді, деп хабарлады kolesa.kz.

Жаңа тәртіпке сәйкес, бұрын пайдаланылған мемлекеттік нөмірлерді қайта рәсімдеу ауқымы кеңейеді. Енді олар мемлекеттік органдар мен дипломаттарға, сондай-ақ бұрынғы иесінің жақын туыстарына, соның ішінде ата-анасына, балаларына, бауырларына, ата-әжесіне, немерелеріне және заңды некедегі жұбайына беріле алады. Сонымен қатар нөмірлер мұрагерлерге де рәсімделеді.

Бұған дейін пайдаланылған нөмірлерді қайта беру тек сұранысы жоғары арнайы нөмірлерге ғана рұқсат етілген еді.

Сондай-ақ жаңа ережелерде «әдемі» нөмірлер қатары кеңейтіледі. Олардың қатарына 101, 121, 131 және басқа да бірізді цифрлық комбинациялар енгізіледі. Бұдан бөлек, бірдей әріптері бар нөмірлер де беріледі.

Мұндай нөмірлер үшін мемлекеттік баж мөлшері бұрыннан белгіленген. Мәселен, жаңа цифрлық комбинациялар үшін 15 айлық есептік көрсеткіш (2026 жылы 64 875 теңге), ал бірдей әріптері бар нөмірлер үшін 72 айлық есептік көрсеткіш (311 400 теңге) төленеді.

Жаңа өзгерістер автокөлік иелеріне нөмірлерді сақтап, оны жақындарына беру мүмкіндігін кеңейтеді.