Елімізде бір донор үш адамның өмірін құтқарды

Елдің әр түкпірінен келген үш пациентке бір ағза донорының екі бүйрегі мен жүрегі трансплантатталды, деп хабарлайды Qrnews.kz тілшісі Денсаулық сақтау министрлігінің баспасөз қызметіне сілтеме жасап.

Мереке алдындағы күні Ұлттық ғылыми онкология орталығы мен Астана қаласының Кардиохирургиялық орталығының трансплантологтары, кардиохирургтары, анестезиологтары мен мейірбикелері құрамындағы жоғары білікті дәрігерлер тобы санавиация бортында Павлодар облысына келді.

Сонымен қатар Астана қаласында күту парағында тұрған бағдарламамен іріктелген реципиенттер қосымша талдаулар тапсыру үшін шақырылды.

Медициналық зерттеп-қараудан өту нәтижесі бойынша және комиссияның шешімі бойынша 26 жастағы реципиент анықталды. Ол бүйректің V терминалды сатысы диагнозымен 6 жыл бойы гемодиализде болған.

Астана қаласындағы Ұлттық ғылыми онкология орталығында дәрігерлер ересек пациентке кадаверлік бүйректі трансплантаттауды сәтті жүргізді.

Реципиент палатаға ауыстырылды,бүгінгі күні оның жағдайы жақсы. Бүйрек толық жұмыс істеп тұр.

Екінші бүйрек балаға Астанадағы Ана мен бала орталығында трансплантатталды.

Үшінші ағза - жүректі трансплантаттау Кардиохирургиялық орталықта жүргізілді.

Inbusiness.kz хабарлағандай, бір донор орта есеппен бес-жеті адамды құтқара алады. Соған қарамастан, қайтыс болғаннан кейін донорлықтан бас тартқан қазақстандықтардың саны 2023 жылы 73 пайызға өскен.

2024 жылдың 10 ақпанындағы мәлімет бойынша, органдарды трансплантациялау үшін кезекте 3 997 қазақстандық тұр. Оның көбі бүйрекке аса мұқтаждар: ересектер – 3562, балалар – 83. Одан кейін бауыр трансплантациясында (ересек – 174, балалар – 10), жүрекке (ересек – 140, балалар – 7), өкпеге (ересек – 16, балаларсыз) және «жүрек-өкпе» кешеніне (ересектер – 2, балалар – 3) кезекте тұр.