Елімізде бензин мен дизель тапшы: Баға өсе ме?

Қазақстанда бензин мен басқа да жанар-жағармай түрлерімен қамтамасыз ету мәселесі бойынша Үкіметтегі брифингте Премьер-Министрдің бірінші орынбасары Роман Скляр пікір білдірді. Бұл жөнінде Kazinform агенттігі хабарлады.

Оның айтуынша, Қазақстан мұнай өндіруші ел ретінде жылына шамамен 90 миллион тонна мұнай өндірсе де, ішкі нарықта жанар-жағармайдың тапшылығы байқалады.

"2017–2019 жылдары еліміздегі үш мұнай өңдеу зауыты жаңғыртылып, жанар-жағармай өндірісі айтарлықтай артты. 2019 жылға қарай бензин, дизель және авиаотын бойынша тапшылық жойылған еді. Алайда соңғы жылдары авиаотынға деген сұраныс күрт өскендіктен, біз бұл өнімді сырттан сатып алуға мәжбүрміз", – деді Роман Скляр.

Контрабанда мен транзит отын тапшылығын ушықтырып отыр

Бірінші вице-премьердің айтуынша, Қазақстанда бензин мен дизель отыны көрші елдермен салыстырғанда әлдеқайда арзан, бұл жанар-жағармайдың елден кетуіне себеп болып отыр.

"Контрабандалық жолмен де, заңды түрде де арзан отын шекара асып кетіп жатыр. Транзиттік көліктер біздің елде арзан отынмен толтырылып, әрі қарай жолын жалғастырады. Бұл біз үшін тапшылық тудырады. Сондықтан алдағы уақытта жанар-жағармай бағасын көрші елдермен теңестіру шараларын қолға аламыз", – деді ол.

Жаңа зауыт пен кеңейтілетін өндіріс

Отын өндіру көлемін арттыру үшін Үкімет бірқатар инфрақұрылымдық жобаларды жоспарлап отыр. Атап айтқанда, Шымкент мұнай өңдеу зауытының екінші кезеңінің құрылысы қолға алынады. Бұл жоба зауыттың жылдық өңдеу қуатын 6 миллионнан 12 миллион тоннаға дейін арттыруға мүмкіндік береді.

Сонымен қатар Павлодар мен Атырау мұнай өңдеу зауыттарының қуатын да арттыру көзделіп отыр.