Елімізде баспана саудасы азайды

Қазақстанда шілде айында тұрғын үйді сатып алу-сату бойынша 37 158 мәміле жасалды. Бұл маусыммен салыстырғанда 4,9 пайызға аз, деп хабарлады Ұлттық статистика бюросы.

Мәмілелердің ең көбі Алматыда тіркелді – 7 263 немесе жалпы көрсеткіштің 19,5 пайызы. Астанада 6 999 мәміле (18,8 пайыз), Қарағанды облысында 2 688 мәміле (7,2 пайыз) жасалған. Ең төмен көрсеткіш Ұлытау облысында тіркелді – 311 мәміле.

Маусыммен салыстырғанда тұрғын үй саудасы Шымкентте 14,2 пайызға, Батыс Қазақстан облысында 14 пайызға, Жамбыл облысында 11,5 пайызға артқан. Ал Маңғыстау облысында мәміле саны 33,7 пайызға, Қарағанды облысында 28,7 пайызға, Түркістан облысында 22,4 пайызға азайды.

Көппәтерлі үйлердегі баспана саудасы бір айда 2,9 пайызға төмендеп, 28 575 мәмілені құрады. Бұл – барлық мәміленің 76,9 пайызы. Сатып алушылар арасында екі бөлмелі пәтерлерге сұраныс жоғары болған: бір айда осындай 11 056 баспана сатылған.

Жеке үйлердің саудасы да 10,8 пайызға азайды. Бұл көрсеткіш Маңғыстау облысында 49 пайызға, Ұлытау облысында 47 пайызға, Қарағанды облысында 32,9 пайызға төмендеген.

2025 жылғы шілдемен салыстырғанда Қазақстандағы тұрғын үй мәмілелерінің саны 6,5 пайызға – 39 742-ден 37 158-ге дейін азайды. Ал биылғы қаңтар-шілде аралығында былтырғы осы кезеңмен салыстырғанда 2,6 пайызға төмендеген.