Елімізде аптап ыстықтан 26 адам көз жұмды

Қазақстанда биыл аптап ыстық салдарынан 26 адам қайтыс болды. Бұл туралы BES.Media басылымына Ұлттық шұғыл медицинаны үйлестіру орталығының бас маманы Зәуре Нұридинова мәлімдеді.

Оның айтуынша, бұл көрсеткіш өткен жылмен салыстырғанда айтарлықтай жоғары. Былтыр аптап ыстықтан жеті адам көз жұмған.

Маманның сөзінше, жоғары температура әсіресе қарттарға, созылмалы ауруы бар адамдарға және балаларға ауыр әсер етеді. Дәрігерлердің көмегіне көбіне құрылысшылар мен күні бойы ашық аспан астында еңбек ететін азаматтар жүгінеді.

Зәуре Нұридинованың мәліметінше, соңғы айларда ыстыққа байланысты 30 мыңға жуық адам дәрігер қарауына жүгінген. Оның 200-і ауруханаға жатқызылған.

Мамандар күн қатты ысыған уақытта далада ұзақ жүрмеуге, көбірек су ішуге және күннің ең ыстық мезгілінде ауыр дене еңбегінен бас тартуға кеңес береді.