Елімізде 12 мыңға жуық бала «Ұлттық қор – балаларға» бағдарламасынан шығарылды

Қазақстанда азаматтығын өзгертуіне байланысты 12 мыңға жуық бала «Ұлттық қор – балаларға» бағдарламасынан шығарылды. Бұл туралы Бірыңғай жинақтаушы зейнетақы қорының  Informburo.kz порталының ресми сауалына берген жауабында айтылды.

Қор мәліметінше, бағдарлама ережесіне сәйкес Қазақстан азаматтығын жоғалтқан немесе азаматтықтан шыққан балалар автоматты түрде бағдарлама қатысушылары қатарынан шығарылады. Бұл ақпарат мемлекеттік деректер базасынан алынады.

Ресми дерек бойынша, 2024 жылы азаматтығын өзгертуіне байланысты 3148 бала бағдарламадан шығарылса, 2025 жылы олардың саны 8757 адамға жеткен. Осылайша, екі жылда жалпы саны шамамен 12 мың бала бағдарлама қатысушысы мәртебесінен айырылған.

Бағдарламадан шығарылған қатысушылардың шоттарындағы қаражат жалпы сомасы 2,4 млн доллар болған. Бұл қаражат бағдарлама ережесіне сәйкес қалған қатысушылар арасында қайта бөлінеді. Соның нәтижесінде әр балаға есептелетін жылдық төлем мөлшеріне әсер етеді.

Мәселен, қайта есептеуді ескергенде, бір балаға 2024 жыл үшін 129,38 доллар, ал 2025 жыл үшін 130,71 доллар есептелген.

Бұдан бөлек, бағдарлама қатысушылары қатарынан деректердегі қателікке байланысты туған жылы дұрыс көрсетілмеген адамдар, сондай-ақ қайтыс болған тұлғалар да шығарылады. Қайтыс болған қатысушылардың жинақтары мұрагерлеріне заң бойынша беріледі.

Айта кетейік, бұған дейін Ұлттық банк бағдарламамен жиналған қаражатты кей жағдайда кіші бауырлар мен әпке-сіңлілерге беру мүмкіндігін де қарастырып жатқанын хабарлаған.