Елге қайтарылған активтер қайда жұмсалады?

Президенттің тапсырмасы бойынша мемлекетке қайтарылған қаражат есебінен Түркістан және Ақмола облыстарында маңызды әлеуметтік нысандардың құрылысы басталмақ.

Үкімет арнайы мемлекеттік қордан алғашқы екі әлеуметтік жобаны іске асыру үшін қаржы бөлу туралы шешім қабылдады. Бірінші жоба бойынша Ақмола облысының Зеренді ауылында 2,1 миллиард теңгеге спорт кешені салынады. Кешен ауданы 6 мың м² құрап, бір ауысымда 80 адамды қабылдай алады. Бұл жоба спортпен шұғылданушылар санын арттыруға және жергілікті тұрғындарға белсенді демалыс үшін қолайлы жағдай жасауға бағытталған. Кешенде бокс, күрес, шаңғы тебу сияқты спорт түрлеріне арналған жабдықтар мен екі жаттығу залы болады.

Екінші жоба Түркістан облысының Темірлан ауылында 300 орындық жаңа өнер мектебінің құрылысын көздейді. Жоба құны 890 миллион теңгені құрайды. 1974 жылы салынған ескі ғимараттың қазіргі жағдайы заманауи талаптарға сай келмейді және күрделі жөндеуге жарамсыз болғандықтан, жаңа мектеп балалардың музыка және хореографиямен шұғылдануына заманауи әрі қауіпсіз орта ұсынатын болады.

Қазіргі уақытта Арнаулы мемлекеттік қорда 177 миллиард теңге жинақталған. Бұл қаражат денсаулық сақтау, білім беру, бұқаралық спорт сияқты әлеуметтік маңызды жобаларды жүзеге асыруға бағытталатын болады.