Елена Рыбакина Australian Open турнирінің жартылай финалына жолдама алды

Қазақстандық теннисші Елена Рыбакина Grand Slam санатындағы Australian Open жарысында жартылай финалға шықты. Әлемдік рейтингте бесінші орында тұрған спортшы ширек финалда екінші ракетка, польшалық Ига Швентекті 7:5, 6:1 есебімен айқын басымдықпен жеңді.

Матчтың екінші сеті 6:1 есебімен аяқталды. Теннисте мұндай нәтиже «багет» деп аталады. Бұл атау француз нанының «1» санына ұқсастығынан шыққан. Осыған орай жанкүйерлер әлеуметтік желіде «Рыбакина Швентекке багет жасап берді» деп жазып жатыр. Айта кету керек, турнирдің алғашқы айналымдарында Рыбакина рейтингте өзінен төмен тұрған қарсыластарын жеңіп шықты.

Биылғы Australian Open бәсекесінде қазақстандық теннисші бірде-бір сет жоғалтқан жоқ. Ол бес кездесуде кортта аз уақыт өткізіп, соңғы 19 матчтың 18-інде жеңіске жетіп отыр. Енді жартылай финалда Рыбакина әлемнің алтыншы ракеткасы, америкалық Джессика Пегуламен күш сынасады.

Бұл – Рыбакинаның Australian Open турниріндегі екінші жартылай финалы. Ол 2023 жылы финалға дейін жетіп, Арина Сабаленкаға жол берген еді. Жалпы, Рыбакина бір рет Grand Slam турнирін жеңген спортшы. 2022 жылы ол Wimbledon жарысында чемпион атанып, Grand Slam турнирінде топ жарған алғашқы қазақстандық теннисші ретінде тарихқа енді. Ресейде туған спортшы 2018 жылдан бері Қазақстан атынан өнер көрсетіп келеді.

Теннисте ең беделді төрт турнир бар: Australian Open, Roland Garros, Wimbledon және US Open. Бұл жарыстарда жартылай финалға шығудың өзі үлкен жетістік саналады. Рыбакина бұл кезеңге жеткені үшін 841 мың доллар жүлдеақы мен 780 рейтингтік ұпай иеленді. Ал турнир жеңімпазы 2000 ұпай мен бұдан да мол сыйақы алады.