Елена Рыбакина әлемнің екінші ракеткасы атанады

Қазақстандық теннисші Елена Рыбакина Индиан-Уэллс қаласында өтіп жатқан WTA-1000 турнирінің жартылай финалына шықты.

Ширек финалда Рыбакина америкалық Джессика Пегуланы 6:1, 7:6 (7:4) есебімен жеңді. Кездесу 1 сағат 30 минутқа созылды.

Жартылай финалда қазақстандық спортшының қарсыласы украиналық Элина Свитолина болады.

Индиан-Уэллс турнирінің жартылай финалына шығу Рыбакинаға әлемдік рейтингте жоғары көтерілуге мүмкіндік берді. Турнир қорытындысы бойынша ол алғаш рет мансабында WTA рейтингінде екінші орынға көтеріледі.

Осы нәтижеден кейін қазақстандық теннисші рейтингте польшалық Ига Швёнтекті басып озады.

Бұған дейін Рыбакина маусымдағы басты мақсаты – әлемнің бірінші ракеткасы атану екенін айтқан. Сол мақсатқа жету үшін ол Билли Джин Кинг кубогының матчтарына қатыспайтынын мәлімдеген.

Сонымен қатар Индиан-Уэллс турнирінде қазақстандық теннисші Анна Данилина жұптық сында финалға шықты.