Елена Рыбакина әлемдік рейтингте үздік үштікке қайта оралды

Australian Open 2026 турнирінің финалына шыққаннан кейін, қазақстандық теннисші Елена Рыбакина әлемнің үшінші ракеткасы атанады. Бұл туралы WTA-ның live-рейтингі көрсетіп отыр.

Қазіргі таңда Рыбакина әлемдік рейтингте бесінші сатыда тұр, ал жаңартылған рейтинг келесі аптада жарияланады. Мельбурн қаласындағы Rod Laver Arena кортында өткен жартылай финалда ол америкалық Джессика Пегуланы 6:3, 7:6 (9:7) есебімен жеңіп, WTA кестесінде үшінші орынға көтерілді.

Рейтингтің бірінші сатысында Арина Соболенко тұр. Елена Рыбакина 31 қаңтар күні дәл осы Соболенкомен чемпиондық атақ үшін бақ сынайды.

WTA-ның үшінші сатысына көтерілу – Елена Рыбакинаның мансабындағы ең үздік нәтиженің қайталануы болмақ. WTA мәліметінше, ол Australian Open 2026 финалының нәтижесіне қарамастан, әлемнің үшінші ракеткасы болып қала береді. Қазақстандық теннисші бұған дейін 2023 жылы да әлемдік рейтингте үшінші орынға көтерілген болатын.