Электросамокат пен велосипедтерге мемлекеттік нөмір беріле ме?

Қазақстанда самокаттар мен велосипедтерге мемлекеттік тіркеу нөмірлері берілмейді. Бұл туралы Ішкі істер министрінің орынбасары Игорь Лепёха мәлімдеді.

Оның айтуынша, самокаттарда арнайы идентификациялық нөмірлер бар, оларды агрегатор-компаниялар орнатады. Алайда бұл нөмірлер өте ұсақ және көзге көрінбейді.

– Біз бұл нөмірлердің көлемін үлкейту бойынша талаптарды әзірлеуді жоспарлап отырмыз. Мысалы, біреу самокатпен адамды қағып кетсе, нөмірі анық көрініп тұрса, жәбірленуші нақты айтып бере алады. Сәйкесінше, біз агрегатор арқылы бұл самокатты кім тізгіндегенін анықтай аламыз, – деді Лепёха мәжіліс кулуарында.

Ол велосипедтерге де мемлекеттік нөмірлер орнату жоспарда жоқ екенін нақтылады.

Еске салайық, бұған дейін ІІМ өкілі Санжар Әділов велосипед пен самокатқа нөмір беру ұсынысын талқыланғанын хабарлаған болатын. Алайда бұл бастама қазіргі таңда қаралып жатқан жоқ.