Электромобильге арнайы белгі тақпағандарға қанша айыппұл салынады?

Қазақстанда электромобильдерге арнайы тану белгісін тағу міндетті. Бұл туралы ҚР Ішкі істер министрлігінің Әкімшілік полиция комитетінің басқарма төрағасы Мұрат Иманбаев мәлімдеді.

«Жол жүру ережесінде бұл анық жазылған. Электромобильдер арнайы тану белгісін тағуы керек. Кейбір адам бұл талапты «Ш» белгісімен шатастырып жатады, бірақ «Ш» белгісі ерікті түрде тағылатын болса, электромобильдерге арналған арнайы белгі міндетті түрде тағылуы керек. Олай болмаған жағдайда, әкімшілік жаза қарастырылған», - деп түсіндірді ол Орталық коммуникациялар қызметінде өткен баспасөз мәслихатында.

Әкімшілік полиция комитетінің басшысы Қайсар Сұлтанбаев электромобиль иелеріне ескертуді немесе айыппұл салуды қарастыратын талаптардың мәнін түсіндірді.

«Электромобильдерге арнайы тану белгісі – жасыл түсті шаршы түрінде және қара түсті 7.22 жол белгісінің рәмізі бар, оның қабырғасы бір жүз елу миллиметр. Бұл белгі көліктің артқы жағына жабыстырылуы тиіс. Белгісі жоқ жүргізушілерге бірінші рет ескерту беріледі, ал қайталанған жағдайда 3 АЕК көлемінде айыппұл салынады», - деді Сұлтанбаев.

Ол сондай-ақ бұл талаптың бастапқыда электромобиль иелеріне қолайлы болу үшін енгізілгенін айтты. Арнайы тану белгісі бар көліктер электр қуатымен қуаттандыруға арналған орындарда тұрақтай алады, ал инспекторлар мұндай көліктерге тиіспейді. Егер тану белгісі жоқ көліктер арнайы орындарға тұрақтаса, оларды шығарып тастау шаралары қолға алынады.

«Сондықтан электр көліктерінің иелері өздерінің көліктерінде бұл белгінің болуына мүдделі болуы керек», - деп қорытындылады Әкімшілік полиция комитетінің төрағасы.