Елді мекендердегі тазалық пен тәртіп үшін жауапкершілік күшейді

Қазақстан Республикасы Экология және табиғи ресурстар министрлігі 2026 жылдың наурыз айында Әкімшілік құқық бұзушылық туралы кодекске енгізілген өзгерістер күшіне енетінін хабарлайды. Бұл шаралар қалалар мен елді мекендерді абаттандыруды бақылауды күшейтуге бағытталған.

Мемлекет басшысы 2025 жылғы 30 желтоқсанда қол қойған Қазақстан Республикасының Заңына сәйкес, Астана, Алматы, Шымкент қалалары мен барлық облыстардың жергілікті атқарушы органдарына ӘҚБтК-нің 434-2 және 505-баптары бойынша әкімшілік хаттамалар толтыру құқығы берілді. Бұл баптар ортақ пайдалану орындарын ластауға және абаттандыру ережелерін бұзуға қатысты. Бұған дейін бұл шараларды тек ішкі істер органдары ғана қолдана алатын.

Жаңа өкілеттіктер қалдықтарды рұқсатсыз тастау, жасыл желектерді зақымдау, сондай-ақ қалалық инфрақұрылымды бүлдіру секілді заң бұзушылықтарға тез әрі тиімді әрекет етуге мүмкіндік береді.

Айта кететін жайт, өткен жылдың өзінде осындай құқық бұзушылықтар үшін 591 мыңнан астам адам жауапкершілікке тартылған. Оның ішінде 189 мыңнан астамы қоғамдық орындарды ластағаны үшін, ал 403 мыңнан астамы абаттандыру ережелерін бұзғаны үшін жазаланды. Салынған айыппұлдардың жалпы сомасы 5,2 миллиард теңгені құрады.

Министрлік бұл жаңа шаралар құқық бұзушылықтың алдын алу тиімділігін арттырып қана қоймай, «Таза Қазақстан» бағдарламасы аясында экологиялық мәдениетті дамытуға қолдау көрсететінін атап өтті.