Елдегі ең қымбат футбол клубы миллиардтаған қаржыны қайда жұмсайды?

Сыбайлас жемқорлыққа қарсы қызмет 2018 жылдан 2023 жылға дейінгі "Астана" футбол клубының қаржылық шығындарын талдап шықты. 

Агенттіктің ресми өкілі Данияр Бигайдаровтың айтуынша, клуб қаражатының 66%-дан астамы, яғни 33 млрд теңге еңбекақы төлеуге жұмсалған. Жалақы мөлшерін клуб басшылығы мен ойыншылардың өзі белгілеген.

Делдал-агенттер футболшыларды тартқаны үшін 4,5 млрд теңге алған. Ал шетелдік оқу-жаттығу жиындарына 1 миллиард теңге кеткен. Клуб Түркия мен Дубайға жиі сапарлар ұйымдастырған. Сонымен қатар "Астананың" өз  академиясы мен футбол алаңы жоқ. Алаң жалдау үшін алты жыл ішінде 1,4 миллиард теңге жұмсаған.

Агенттік өкілдері футболды дамытуға УЕФА, ФИФА және букмекерлік компаниялардан да миллиардтаған қаражат түсетінін атап өтті. Соңғы алты жылда клуб халықаралық ұйымдардан шамамен 31 миллиард теңге алған, алайда бұл қаржының қалай жұмсалғаны жайлы ақпарат жеткіліксіз.

Анализ нәтижесі қомақты қаражат легионерлерді ұстауға, шетелдегі жиындарға, жоғары төлемдерге және қымбат агенттік қызметтерге жұмсалады. Осыған байланысты Антикор кәсіби спорт клубтарында легионерлердің үлесін азайтуға және қаржыны бұқаралық (балалар-жасөспірімдер спорты) спортқа бағыттауға кеңес береді. Сондай-ақ жоғары жетістіктер спортын қаржыландыруды орталықтандыру және Е-sport ұлттық цифрлық платформасын енгізу ұсынылды, ол спорт саласындағы шығындарды бақылауға мүмкіндік береді.