Ел дамуына үлес қосқандар: Түркістанда Мемлекеттік қызметшілер күні жоғары деңгейде аталып өтті

Түркістан қаласындағы «Конгресс Холл» көпсалалы кешенінде 23 маусым – Мемлекеттік қызметші күніне орай салтанатты жиын ұйымдастырылды, деп хабарлайды Түркістан облысы әкімінің баспасөз қызметі.

Мерекелік іс-шараға Түркістан облысының әкімі Нұралхан Көшеров қатысып, мемлекеттік қызмет саласында адал еңбек етіп жүрген мамандарды кәсіби мерекелерімен құттықтады.

Өз сөзінде облыс әкімі мемлекеттік қызметшілердің ел дамуындағы рөліне тоқталып, ҚР Президенті Қасым-Жомарт Тоқаевтың мемлекеттік қызметшілерге жүктелген міндеттер мен жауапкершілік туралы тапсырмаларын атап өтті. Нұралхан Көшеров Түркістан облысының облыс орталығы мәртебесін алған 8 жыл ішіндегі әлеуметтік-экономикалық көрсеткіштеріне тоқталып, өңірдегі қарқынды дамуда мемлекеттік қызметшілердің қосқан үлесі зор екенін баса айтты.

«Облысымыз әлеуметтік-экономикалық даму көрсеткіші бойынша республикада көш бастап келеді. Биылғы бес айдың қорытындысы бойынша қысқа мерзімді экономикалық өсім 123,3 пайызды құрап, өңіріміз республика бойынша бірінші орынға шықты. Бұл – мемлекеттік қызметшілердің қажырлы еңбегінің нәтижесі», – деді облыс басшысы.

Салтанатты шара барысында өңірдің дамуына үлес қосқан бірқатар мемлекеттік қызметшіге мемлекеттік және ведомстволық наградалар, Құрмет грамоталары мен Алғыс хаттар табысталды. Сондай-ақ, Түркістан облыстық мәслихатының төрағасы Нұралы Әбішов үздік қызметкерлерді марапаттады. Мерекелік жиын өнерпаздардың концерттік бағдарламасына ұласты.

Бүгінгі таңда Түркістан облысындағы 520 мекемеде 6 327 мемлекеттік қызметші қызмет атқаруда. Өңірде меритократия қағидасы қатаң сақталып, кадрлық әлеуетті дамытуға ерекше көңіл бөлінуде. Атап айтқанда, 2021 жылдан бері 272 ауыл әкімі тікелей халықтың таңдауымен сайланды, ал өңірлік кадрлық резервке қабылданған дарынды жастар жауапты қызметтерге тартылуда.