Экс-министр Бишімбаев марқұм Салтанат Нүкенованың отбасына 17 млн теңге төлейтін болды

Марқұм Салтанат Нүкенованың ағасы Айтбек Амангелді қарындасын өлтіргені үшін сотталған Қуаныш Бишімбаевтан моральдық зиян үшін өтемақы өндіріп алды. Бұл туралы Астана қалалық сотының баспасөз қызметі хабарлады.

"Ағасы қайғылы оқиға салдарынан моральдық азап шеккенін, денсаулығының нашарлағанын және қайғылы оқиғаға байланысты еңбекке қабілеттілігін жоғалтқанын көрсеткен. Марқұмның ата-анасы талап қоюшының пайдасына өндіруден бас тартқан. Талап қоюда қылмыстық іс аясында заң қызметтеріне төлеуге кеткен шығындар да талап етілді", – делінген хабарламада.

Сот шешімі бойынша жақын туысының өлімі талап қоюшының моральдық жағдайына теріс әсер еткен және оның жеке мүліктік емес құқықтарын бұзған. Сондықтан талап ішінара қанағаттандырылды.

Бишімбаевтан қылмыстық іс бойынша келтірілген 6 877 672 теңге және моральдық зиян үшін 10 млн теңге өтемақы өндірілді. Сот шешімі әлі заңды күшіне енген жоқ.