Экс-дипломат Сәкен Мамаш жұбайын азаптағаны үшін 6 жылға сотталды

Астанадағы сот Қазақстанның бұрынғы дипломаты Сәкен Мамашты жұбайын азаптағаны үшін кінәлі деп танып, 6 жылға бас бостандығынан айырды. Үкімді судья Артур Абдыханов оқыды.

"Сәкен Мамаш Қылмыстық кодекстің 110-бабы 2-бөлігі 1-тармағы («Материалдық тұрғыда тәуелді адамға қатысты азаптау») бойынша кінәлі деп танылып, орта қауіпсіздік деңгейіндегі түзеу мекемесінде 6 жыл мерзімге бас бостандығынан айырылсын. Сонымен қатар оны дипломатиялық дәрежесінен айыру туралы шешім шығарылды", – деді судья.

Сот процесі 10 маусымда басталды. Жәбірленуші Карина Госман істі жабық режимде қарауды сұрады, себебі сот барысында олардың жеке өміріне қатысты интимдік жайттар айтылып, бұл балаларға кері әсер етуі мүмкін екенін жеткізді. Ал Сәкен Мамаш соттың ашық өтуін қалады, бірақ өзінің сот залындағы суреттерінің жариялануына қарсы болды.

Сот отырыстары кезінде бұрынғы дипломат Мамаш өзін уақытша қамаудан босатуды сұраған. Алайда Карина Госман оның өзін қудалап, қорқытқанын айтып, қарсы болды. Сот бұл талапты қанағаттандырмады.

2024 жылдың мамырында Карина Госман күйеуі өзін және әпкесін соққыға жыққанын мәлімдеген болатын. Осыдан кейін Сыртқы істер министрлігі Сәкен Мамашты Біріккен Араб Әмірліктерінен елге шақыртып алды. Карина балаларымен бірге Астанадағы дағдарыс орталығына орналасты. Кейінірек Мамашқа ҚР ҚК 110-бабы бойынша 7 жылға дейін бас бостандығынан айырылуы мүмкін екені хабарланған.

2024 жылдың қазанында Карина Госман ресми түрде ажырасқанын мәлімдеген еді.