Екпе алмаған балалар мектеп пен балабақшаға кіргізілмейді

Қазақстанда қызылша ауруы анықталған жағдайда екпе алмаған балаларды мектептер мен балабақшаларға уақытша кіргізбеу туралы шешім қабылданды. Тиісті қаулыға елдің бас мемлекеттік санитарлық дәрігері Сархат Бейсенова қол қойды. Құжат 19 ақпаннан бастап күшіне енді.

Қаулыға сәйкес, білім басқармалары балаларды вакцинациялау көрсеткішін кемінде 90 пайыз деңгейінде ұстауды бақылауы тиіс. Сондай-ақ білім беру ұйымдарында күн сайын «таңғы сүзгі» жүргізіліп, ауру белгілері бар балалар мен педагогтердің кіргізілмеуі қадағаланады. Ата-аналарға иммундаудың маңызы туралы түсіндіру жұмыстары күшейтіледі.

Сонымен қатар қызылша дерегі тіркелген жағдайда екпе алмаған балаларды балабақша мен мектептен уақытша шеттету тапсырылды.

Бұған дейін Санитариялық-эпидемиологиялық бақылау комитеті елде жаппай вакцинадан бас тарту ұжымдық иммунитеттің төмендеуіне әкелгенін хабарлаған. Мәліметке сәйкес, қызылшамен ауырған балалардың 59 пайызы ата-анасының келісім бермеуіне байланысты екпе алмаған.