Экономиканың жаңа тынысы: Түркістанда 5 миллиардтық зауыт іске қосылды

Түркістан облысының индустриялық картасы жаңа өндіріс орнымен толықты. «Turan» арнайы экономикалық аймағында «Qaz Natural Laminat» зауыты салтанатты түрде ашылды. 5 миллиард теңгелік инвестиция салынған бұл жоба тек жұмыс орындарын ашып қана қоймай, Қазақстанның құрылыс нарығындағы импорт үлесін айтарлықтай қысқартуды мақсат етіп отыр, деп хабарлайды Түркістан облысы әкімінің баспасөз қызметі.

Бүгінде облыста импортты алмастыру - басты басымдықтардың бірі. Соңғы жылдардағы талдау көрсеткендей, өңірге сырттан әкелінетін тауарлар көлемі триллиондаған теңгемен өлшенеді. Дәл осы олқылықтың орнын толтыру үшін Түркістан облысының әкімдігі соңғы жылдары ірі инвестициялық жобаларға жол ашты.

Жобаның ерекшелігі неде?

 Кәсіпорын халықаралық стандарттарға сай заманауи технологиялармен жабдықталған.Жылына 840 мың шаршы метр сапалы ламинат өндіру мүмкіндігі. Алғашқы кезеңде 65 адам тұрақты жұмыспен қамтылса, жоба толық қуатына жеткенде қызметкерлер саны 150-ге дейін жетеді.

Кәсіпорын құрылыс материалдары нарығындағы отандық өнім үлесін арттырып, ішкі сұранысты қанағаттандыруға бағытталған. Сонымен қатар кәсіпорын басшылығы болашақта өнімді Орталық Азия елдеріне экспорттауды жоспарлап отыр.

«Qaz Natural Laminat» ЖШС директоры Луо Ионг өндіріс орнында халықаралық стандарттарға сәйкес заманауи технологиялар қолданылатынын атап өтті.