Екі жылдан өмір бойына: Сот 13 жасар қызды зорлаған ер адамға шыққан үкімді қайта қарады

Шығыс Қазақстан облысында апелляциялық сот 13 жасар жасөспірімді зорлаған ер адамға қатысты үкімді қатаңдатып, оны өмір бойына бас бостандығынан айыру туралы шешім шығарды. Бұл туралы "31 арна" хабарлады. Өскеменде өткен сот процесінде алғашқы инстанцияның шешімі қайта қаралып, айыпталушыға қатысты жаза түбегейлі өзгертілді.

Іс материалдарына сәйкес, 30 жастағы ер адам мектеп оқушысын айдалаға алып шығып, жыныстық қатынасқа түскен. Бұған дейін бірінші инстанция соты оқиға "екі жақтың келісімімен болған" деп танып, істі «Зорлау» бабынан «16 жасқа толмаған тұлғамен жыныстық қатынасқа түсу» бабына қайта ауыстырған болатын. Соның салдарынан сотталушы небәрі екі жылға ғана бас бостандығынан айырылған еді.

Жәбірленушінің туыстары мұндай жеңіл жазамен келіспей, үкімді қайта қарауды талап етті. Адвокат Жанболат Әкежановтың айтуынша, апелляциялық инстанция сотқа дейінгі тергеу амалдарының толық жүргізілгенін және жиналған дәлелдердің жеткілікті екенін растады. Сот алғашқы инстанцияның маңызды айғақтарды ескермегенін алға тартты.