Джей Лоның концертіне мыңдаған полицей жұмылдырылды – депутат ІІМ жұмысына сын айтты

Қазақстан Парламенті Мәжілісінің депутаты, Respublica партиясы фракциясының мүшесі Олжас Құспеков Премьер-Министрге депутаттық сауал жолдап, коммерциялық іс-шараларда тәртіпті қамтамасыз ету үшін полицейлерді шамадан тыс тарту мәселесін көтерді.

Депутаттың сөзінше, соңғы айларда елде ауқымды концерттер мен спорттық матчтар жиілеп, олардың қауіпсіздігін қамтамасыз етуге Ішкі істер министрлігінің бүкіл жеке құрамы дерлік жұмылдырылуда.

"Мысалы, Астанада өткен Дженнифер Лопестің концертіне шамамен 1300 полицей, ал Алматыда – 2240 полиция қызметкері, әскерилер мен еріктілер тартылды. Соның салдарынан парадокс жағдай қалыптасады: жаппай шоу мен концерттерге бүкіл жеке құрам жұмылдырылады да, көшелерді патрульдеуге адам қалмайды", – деді Құспеков.

Оның айтуынша, бұл – мемлекеттік ресурстарды тиімсіз пайдаланудың көрінісі. Депутат қауіпсіздікті қамтамасыз ету міндетін жеке секторға берудің қисынды екенін жеткізді.

"Бүгінде елімізде 4 мыңға жуық жеке күзет ұйымы жұмыс істейді. Онда 100 мыңнан астам кәсіби қызметкер бар, олар бұл міндетті өз мойнына алуға дайын", – деп қосты ол.

Respublica фракциясы ұсынған шаралар:

• коммерциялық іс-шараларда қауіпсіздікті біртіндеп жеке күзет құрылымдарына беру;

• полиция күшін тек мемлекеттік және қоғамдық-саяси маңызы бар оқиғаларға пайдалану.

Депутат мәселенің өзектілігін 2025 жылғы 30 қыркүйекте Алматыда өтетін «Қайрат» – «Реал Мадрид» матчы да айқындайтынын атап өтті. Бұл ойынға 2500-ден астам полицей және Ұлттық ұланның 300 әскери қызметкері тартылмақ.

"Біз жүйені қайта қарауымыз қажет: полиция – бұл мемлекеттің және азаматтардың қауіпсіздігі үшін. Ол концерттер мен жеке шараларды күзету үшін емес", – деп түйіндеді Құспеков.