Дуров не үшін Қытайдың жасанды интеллект саласында АҚШ-тан озып бара жатқанын айтты

Telegram мессенджерінің негізін қалаушы Павел Дуров Қытайдың жасанды интеллект саласында АҚШ-ты қуып жетіп, тіпті озып бара жатқаны туралы пікірін білдірді. Ол бұл жетістіктің басты себебі ретінде Қытайдың білім беру жүйесінің ерекшелігін атады.

Дуровтың айтуынша, Қытайдың ЖИ алгоритмдерін дамытудағы жетістіктері кездейсоқ емес. Бұл елдің оқушылары жылдар бойы халықаралық олимпиадаларда математика мен бағдарламалау бойынша ең жоғары нәтижелер көрсетіп келеді.

"Қытайдың орта білім беру жүйесі математика мен жаратылыстану ғылымдары бойынша үздік мамандарды даярлауда Батыстан әлдеқайда озық. Бұл жүйе оқушылар арасындағы қатал бәсекелестікті ынталандырады. Мұндай тәсіл кеңес мектебінің жоғары тиімді моделінен алынған", – деп жазды Дуров өз Telegram-арнасында.

Оның пікірінше, Батыс елдерінде керісінше, оқушылардың жетістіктерін жария түрде бағалауға шектеу қойылады, рейтингтер мен бағалар жасырын қалады. Бұл оқушыларды психологиялық қысымнан қорғауға бағытталғанымен, үздіктердің ынтасын төмендетеді.

"Жеңіс пен жеңіліс – бір тиынның екі жағы. Егер сіз жеңілгендерді алып тастасаңыз, жеңімпаздар да жоғалады", – деді Дуров.

Ол сондай-ақ дарынды жастардың академиялық жетістіктерден гөрі, бейнеойындардағы бәсекелестікке көбірек қызығатынын атап өтті. Себебі виртуалды ойындарда олардың деңгейі мен рейтингтері ашық көрсетіледі.

Дуровтың ойынша, барлық оқушыға үздікпіз деп сендіру қысқа мерзімді ғана әсер береді. Ал шынайы өмірде нақты бағалар мен рейтингтер бар, олар спортта да, бизнесте де, ғылым мен технологияда да көрініс табады.

Қытайдың DeepSeek стартапының жетістіктері – осындай ашық бәсекелестік жүйесінің нәтижесі.

"Егер АҚШ-тың орта білім беру жүйесі түбегейлі өзгермесе, Қытайдың технологиядағы үстемдігі сөзсіз болады", – деп түйіндеді Дуров.