Дүниежүзілік банк Қазақстанға жыл сайын 1 млрд доллар қаржы бөлмек: Не үшін

Премьер-министрдің орынбасары – Ұлттық экономика министрі Серік Жұманғарин Дүниежүзілік банк тобының өкілдерімен 2026–2031 жылдарға арналған жаңа Әріптестік шеңберлік стратегиясын қалыптастыру мәселесін талқылады.

Кездесу барысында Жұманғарин ұсынылып отырған стратегия реформаларды сараптамалық қолдау, қаржыландыру және бірлескен бастамалар арқылы жүзеге асыруға негіз болатынын атап өтті.

Үкіметтің мәліметінше, Дүниежүзілік банк алдағы алты жыл ішінде жыл сайын 1 млрд долларға дейін қаржы бөлуге дайын екенін білдірген. Бұл жеке секторды нығайтуға, инфрақұрылымды дамытуға және экономиканың бәсекеге қабілеттілігін арттыруға қосымша мүмкіндік береді.

Басым бағыттар қандай?

Жаңа стратегия жобасында көлік және цифрлық байланыс, климаттық күн тәртібі, су және энергетика салаларындағы қызмет сапасын арттыру, қаржы нарықтарын дамыту, жеке инвестицияларды ынталандыру және жаңартылатын энергия көздерін кеңінен пайдалану басым бағыт ретінде айқындалған.

2020–2025 жылдарға арналған алдыңғы стратегия кезеңінде жалпы құны 4,2 млрд доллар болатын 14 жоба іске асырылған. Олардың қатарында «Батыс Еуропа – Батыс Қытай» халықаралық транзиттік дәлізін дамыту, Алматы – Қорғас автожолын жаңғырту, суару және дренаж жүйелерін модернизациялау бар.

IFC-тің жоспарлары

Дүниежүзілік банк тобына кіретін Халықаралық қаржы корпорациясы мемлекеттік-жекеменшік әріптестік жобаларына консультациялық қолдау мен инвестициялық қызметті жалғастыру ниетін білдірді. Бұл кредит беру, жеке инвесторлардың қатысуын кеңейту бағыттарын қамтиды.

Алдағы басымдықтар қатарында теміржол инфрақұрылымын жаңғырту, қаржы институттары арқылы шағын және микробизнесті қолдау, агроөнеркәсіп кешенін дамыту, соның ішінде заманауи ауыл шаруашылығы техникасын жеткізу мен астықты терең өңдеу жобаларын қаржыландыру бар.