«Дружба» құбыры жабылды: Қазақстан мұнайы енді қай бағытпен тасымалданады?

Қазақстан «Дружба» мұнай құбыры арқылы транзиттің тоқтауына байланысты Германияға экспортталатын 260 мың тонна мұнайды балама бағыттарға қайта бөлді, деп хабарлады Энергетика министрлігі.

Ведомство мәліметінше, мұнайдың 100 мың тоннасы Усть-Луга портына, ал 160 мың тоннасы Каспий құбыр консорциумы жүйесіне жіберіледі. Бұл өзгерістер тасымалдаушылармен келісілген және операциялық сипатқа ие.

Министрлік өкілі Әсел Серікпаеваның айтуынша, маршруттардың өзгеруі мұнай өндірудің жылдық жоспарына әсер етпейді және экспорттың тұрақтылығы толық сақталады.

Бұған дейін Энергетика министрі Ерлан Ақкенженов Ресей 1 мамырдан бастап «Дружба» арқылы қазақстандық мұнай транзитін тоқтатуы мүмкін екенін айтқан. Кейін бұл ақпаратты Ресей тарапы да растаған.

Жалпы Қазақстан жылына шамамен 80 млн тонна мұнай экспорттайды. Оның ішінде «Дружба» бағытымен 3 млн тонна жеткізу жоспарланған, негізгі сатып алушы – Германия.