Дрондар соққыларынан кейін Wildberries қанша шығынға батты?

Wildberries пен сауда алаңында жұмыс істейтін сатушылардың дрон шабуылдарынан келген жалпы шығыны 600–800 млрд рубльге жетуі мүмкін. Мұндай есепті Data Insight зерттеу агенттігінің жетекші сарапшысы Сергей Семко келтірді, деп жазады Forbes.

Сарапшының есебінше, Wildberries-ті басқаратын RWB компаниясына қоймалар мен инфрақұрылымды қалпына келтіру 147–223 млрд рубльге түсуі мүмкін. Егер нысандарды толық бұзып, қалдықтарды шығару және аумақты қалпына келтіру қажет болса, шығын 278,9 млрд рубльге дейін өсуі ықтимал.

Ал сауда алаңындағы сатушылардың шығыны алдын ала есеп бойынша 445–507,8 млрд рубльге жетуі мүмкін.

Ресейдің электрондық сауда алаңдарына тауар жеткізушілер қауымдастығының басшысы Маргарита Евстигнеева да осыған ұқсас есеп келтірген. Оның айтуынша, Wildberries қоймаларына жасалған шабуылдардан 400 мыңнан астам сатушы зардап шеккен. Жоғалған табысты қоса есептегенде, жалпы шығын 600–700 млрд рубльге жетуі мүмкін.

Wildberries негізін қалаушы Татьяна Ким Орталық Азия және басқа елдердегі ондаған мың кәсіпкердің миллиардтаған шығынға ұшырағанын растады. Компания басшылығы Қазақстан мен Қырғызстанды қоса алғанда, бірқатар елдің сауда ведомстволары және кәсіпкерлер қауымдастықтарымен кездескен.

Wildberries зардап шеккен сатушыларға олардың қай елден екеніне қарамастан өтемақы төлеу басталғанын мәлімдеді.

Шілденің ортасынан бері Украина қарулы күштері Ресейдің әр өңіріндегі Wildberries логистикалық орталықтарына дрондармен тұрақты түрде соққы жасап келеді. Reuters спутниктік суреттерді талдау нәтижесінде компания қойма қуатының шамамен 20 пайызынан айырылуы мүмкін екенін хабарлаған.

Украина президенті Владимир Зеленский Wildberries қоймалары дрон өндірісіне қажетті санкция салынған бөлшектерді, навигациялық жабдықтарды және басқа да әскери мақсаттағы тауарларды жеткізу үшін пайдаланылғанын мәлімдеген.