Дрон шабуылдарынан кейін Қазақстан мұнайын өзге бағыттармен тасымалдады

Каспий құбыр консорциумында (КҚК) мұнай қабылдауға уақытша шектеу қойылуына байланысты Қазақстан шілде айында экспорттық мұнайдың бір бөлігін балама бағыттарға жөнелтті, деп хабарлады Энергетика министрлігінің баспасөз қызметі.

Ведомствоның ресми өкілі Әсел Серікбаеваның айтуынша, мұнайдың бір бөлігі Ақтау портына, Атасу – Алашанькоу құбырына және Атырау – Самара бағытына жіберілген.

«Мұнай көлемінің бір бөлігі өзге тасымал бағыттарына, соның ішінде Ақтау портына, Атасу – Алашанькоу және Атырау – Самара бағыттарына қайта бөлінді», – деді ол.

Министрлік қосымша экспорт жолдары ретінде Каспий теңізі мен Әзербайжан аумағы арқылы өтетін Баку – Тбилиси – Жейхан және Баку – Супса бағыттарын да қарастырып отыр. Қазір Баку – Тбилиси – Жейхан құбырымен жылына шамамен 1,2 млн тонна Қазақстан мұнайы тасымалданады. Әзербайжан тарапы бұл көлемді жылына 2,2 млн тоннаға дейін ұлғайтуға дайын екенін білдірген.

Шілдеде Новороссийскідегі айлақтарда мұнай тиелетін танкерлерге жасалған бірнеше дрон шабуылынан кейін КҚК жұмысы екі рет тоқтатылған еді. Қазақстан экспортқа шығаратын мұнайының 80 пайызға жуығын осы құбыр арқылы тасымалдайды.