Доллар бір аптада 10 теңгеге арзандады: бұған не себеп?

Қазақстанда осы аптада АҚШ долларының бағамы шамамен 10 теңгеге төмендеді. Қазақстан қаржыгерлері қауымдастығы мұны валюта нарығындағы ұсыныстың артуымен байланыстырды.

Сарапшылардың мәліметінше, 2 шілдедегі сауда қорытындысы бойынша доллар бағамы 474,42 теңгені құрады. Сонымен қатар Қазақстан қор биржасындағы (KASE) сауда көлемі 566,6 млн долларға жетіп, айтарлықтай өскен. Бұл нарықта ірі көлемдегі бір реттік валюталық операциялар жүргізілгенін көрсетуі мүмкін.

Қауымдастықтың бағалауынша, теңгенің нығаюына бірнеше фактор әсер еткен. Атап айтқанда, Ұлттық банк шілде айында шетел валютасын сатуды 841 млн доллардан 1 млрд долларға дейін ұлғайтқан. Бұған қоса, квазимемлекеттік сектор компаниялары мен экспорттаушылар да валютаны көбірек сатқан.

Сарапшылардың пікірінше, осының нәтижесінде нарықтағы валюта ұсынысы сұраныстан асып, теңге нығайған. Сонымен қатар кейбір инвесторлар бұған дейін сатып алған долларын қазіргі бағаммен сатып, пайдасын тіркеуге шешім қабылдаған.

Осы уақытта әлемдік нарықта мұнай бағасы бір барреліне 71,8 долларға дейін көтерілді. Алайда өсімге АҚШ пен Иран арасындағы келіссөздердің оң нәтиже беруі мүмкін деген ақпарат әсер етіп, мұнай бағасының одан әрі қымбаттауын тежеген.