Доллар арзандаса да, дүкендегі баға неге түспейді?

Қазақстанда теңге нығайса да, тауар бағасы бірден төмендемейді. Бұл құбылыстың себебін Ұлттық экономика министрлігі Informburo сауалына берген жауабында түсіндірді.

Ведомство мәліметінше, ішкі нарықтағы бағалар теңге әлсіреген кезде тез өседі, ал нығайғанда баяу төмендейді. Бұл импорттаушылардың шығындарының артуы, валюталық тәуекелдер және нарықтың шетелдік жеткізілімдерге тәуелділігімен байланысты.

Министрлік дерегінше, доллар бағамына ең тәуелді тауарлар – тұрмыстық техника, электроника, көлік пен жабдықтар, жеңіл өнеркәсіп өнімдері, дәрі-дәрмек және кейбір азық-түлік түрлері. Олардың қатарында қант, балық, кондитерлік өнімдер мен сүт өнімдері бар.

Сондай-ақ баға өзгерісі бірден емес, белгілі бір уақыттан кейін байқалады. Себебі өндірушілер шығынды есептегенде тек қазіргі бағамды емес, болашақтағы ықтимал өзгерістерді де ескереді.

Министрлік Ұлттық банктің деректеріне сүйене отырып, соңғы 10 жылда теңге орта есеппен жылына 8,9 пайызға әлсірегенін атап өтті. Сондықтан бизнес шығындарды жоспарлағанда теңгенің болашақта қайта әлсіреу ықтималдығын да есепке алады.

Сарапшылардың айтуынша, теңге нығайған жылдары инфляция да баяулаған. Алайда бағаның төмендеуі әдетте бірден байқалмайды.