Дисквалификацияға қарамастан: Жеңіл атлетика федерациясы Ясмина Тоқсанбаеваға жүлде ақшасын толық төлейді

Қазақстан жеңіл атлетика федерациясы Азия ойындарында аяқ киім талабының бұзылуына байланысты алтын медалінен айырылған Ясмина Тоқсанбаеваға қатысты ресми мәлімдеме жасады. Ведомство өкілдері спортшының нәтижесі жойылғанына қарамастан, оған қарастырылған барлық жүлдеақы толық көлемде төленетінін хабарлады.

Федерацияның хабарлауынша, World Athletics халықаралық ұйымы бекіткен рұқсат етілген спорттық аяқ киімдер тізімінде ASICS бренді ресми түрде көрсетілген. Дегенмен Ясмина Тоқсанбаева жарыста киген нақты модель ол тізімге енбей қалған. Соған қарамастан, спортшының аяқ киімі жарыс басталмай тұрып арнайы тексерістен өтіп, төрешілер оған стартқа шығуға ресми түрде рұқсат берген.

Осыған байланысты Қазақстан тарапы халықаралық ұйымның соңғы шешіміне келіспей, бекітілген тәртіп бойынша ресми шағым мен протест жолдады.

«Біз үшін Ясмина – айқын чемпион. Федерация оны соңына дейін қолдайды. Жіберілген протест пен шағымның қорытындысы қандай болса да, чемпионға арналған барлық жүлде төлемдерін федерация өз қаражаты есебінен толықтай төлеп береді», – делінген ұйымның ресми хабарламасында.