"Диплом жасап беретін адам бар ма?": Сотта Перизат Қайраттың хаты оқылды

Астанадағы сотта Перизат Қайраттың құрбысы Толғанай Боранқұл жауап берді. Перизат Қайрат оған қазақстандық жоғары білім туралы диплом жасату жайында хабарласқан.

Прокурорлар сот отырысында Перизат Қайраттың құрбысына жазған хабарламасын оқып берді:

«Қазақстандық дипломды "жасатып алуға" болатын адам бар ма? Қазірдің өзінде бір университетке жүгініп көрдім», – делінген хабарламада.

Толғанай Боранқұлдың айтуынша, сол кезде Қайрат мемлекеттік мекемеде жұмысқа орналасуға дайындалып жатқан. Ол үшін қазақстандық жоғары білім туралы диплом қажет болған.

Ал сотта жауап берген Перизат Қайрат бұл хабарламаны нострификация – яғни шетелдік дипломды Қазақстанда мойындату мәселесіне байланысты жазғанын мәлімдеді.

Бұған дейін прокурор Мәдина Оразалина Қайраттың білімі туралы мәліметтерді жария еткен еді. Оның айтуынша, Перизат Қайрат Ақтау қаласындағы №10 мектепте 9-сыныпты бітірген, кейін Маңғыстау облыстық өнер колледжінің "хор дирижерлігі" мамандығына оқуға түскен.