Диабетті әлеуметтік маңызы бар аурулар тізіміне қайтару туралы петиция жарияланды

Қазақстанда қант диабетін әлеуметтік маңызы бар аурулар қатарына қайта енгізу туралы петиция құрылды. Оған «Диабеттік ата-аналар комитеті» қоғамдық қорының жетекшісі Руслан Закиев бастамашы болды.

Петицияда қант диабетімен өмір сүретін жүздеген мың қазақстандықтың өмірі мен құқықтарына қауіп төндіретін бірқатар шешімді қайта қарау сұралған. Құжат Денсаулық сақтау министрі Ақмарал Әлназароваға жолданып, онда мынадай мәселелер көтерілген:

– Диабетті әлеуметтік маңызы бар аурулар тізімінен шығару. Автордың айтуынша, қант диабетінің 1-типімен ауыратын және міндетті әлеуметтік медициналық сақтандыру (МӘМС) жүйесіне қатыспайтын азаматтар инсулинсіз қалуы мүмкін, бұл бірнеше күн ішінде өлімге әкелуі ықтимал.
– GLP-1 препараттарын қаржыландыруды тоқтату. ҚД-2 диагнозы бар науқастар тиімді әрі заманауи емнен айырылған.
– Инсулиндік помпа пайдаланатын ересектер мен жүкті әйелдерге қажетті шығын материалдарының жоқтығы. Бұл денсаулыққа ауыр зардап тигізеді.
– 18 жастан асқан ҚД-1 науқастарына мүгедектік берудегі кедергілер. Бұл олардың медициналық көмек алу құқығын шектейді.
– Қант диабетімен күресудің мемлекеттік бағдарламасының болмауы.

Петиция авторы қант диабетімен өмір сүретін азаматтар құқықтарының сақталуын және мемлекеттен тұрақты қолдау көрсетілуін талап етеді. Ол Президент Қасым-Жомарт Тоқаевтан да бұл мәселеге араласуды сұрап отыр.

Денсаулық сақтау министрі бұған дейін диабетті әлеуметтік маңызы бар аурулар тізімінен шығарып, оны МӘМС жүйесіне көшіруде проблема көрмейтінін айтқан. Оның сөзінше, бұл шешім Мемлекет басшысының тапсырмасымен қабылданған.

Ресми дерек бойынша, Қазақстанда қазір 534 мыңнан астам адам қант диабетімен тіркеуде тұр. Сарапшылардың бағалауынша, шынайы көрсеткіш 800 мыңға жуық. Бұл сан күн сайын артып келеді.