Депутаттардың бастамасынан кейін ұшақ билеттері қымбаттауы мүмкін

Елде қайтарылмайтын авиабилеттерден бас тарту мәселесі қаралып жатыр. Бұл бастама қабылданған жағдайда билет бағасының өсуі ықтимал. Мұндай пікірді Үкіметтегі брифингте көлік вице-министрі Талғат Ластаев айтты.

Айта кетейік, қайтарылмайтын билетті алып тастау туралы ұсыныс алғаш рет 2023 жылы көтерілген. Ал 2024 жылдың қыркүйегінде Мәжіліс «Тұтынушылардың құқықтарын қорғау туралы» заң жобасын бірінші оқылымда мақұлдаған еді. Құжатқа осы норманы енгізу көзделген.

Ластаевтың сөзінше, билет толық қайтарылатын форматқа өтсе, шығын авиакомпания емес, сол рейске билет алған басқа жолаушылардың тарифіне әсер етуі мүмкін.

"Билет толық қайтарылатын болса, компания барлық шығынды өз есебінен жаппайды. Бұл қаражат рейске келетін басқа жолаушылардың билеттеріне қосылады. Авиакомпаниялардың табысы тек билет сатудан түсетіндіктен, мұндай өзгерістер тарифтердің қымбаттауына алып келуі ықтимал", – деді ол.

Қазір министрлік бұл ұсынысты депутаттар және салалық сарапшылармен талқылау үстінде. Талқылау нәтижесінде нақты қандай жағдайларда билет құны толық қайтарылатыны және қандай кезде халықаралық нормалар сақталатыны айқындалмақ.